DONOSTIAKO ORFEOIAREN MAGIA

Ostiral Musikalen hirugarren zita otsailaren 24an izango da, Donostiako Orfeoia luxuzko protagonista izango dela (19:00). Berangoetako Kultur Etxeko ekitaldi aretoan proiektatuko dira aipatu taldeko ehungarren zein 110. urteurrenak ospatzeko kontzertuak.

Anoetako estadioan zuzenean egin zuten grabazioa. Donostiako Orfeoiak Euskadiko Orkestra Sinfonikoa izan zuen lagun. Bestalde, aipagarria da errepertorioaren xarma, musika klasikoa ez den beste estilo batzuk gogoko dituztenentzat gozagarri: herri kantak ere hartzen ditu, Mikel Laboaren abestiak, Gutierrezenak, Olaizolarenak, eta abar. Victor Pablo Perez da Euskadiko Orkestra Sinfonikoko zuzendaria eta Jose Sainz de Alfaro orfeoiarena.

Hirugarren ekitaldia dugu oraingokoa, aurreko biak harrera ona izan ostean: hurrenez hurren, 60 eta 100 lagunek parte hartu zuten. "Publikoaren erantzunak asebete gaitu", dio Juan Carlos Balerdik. Berarekin batera, musutruk lan egiten duten beste bort lagunek osatzen dute Grupo Pro Music taldea: Ignacio, Felix Lareki, Maria Jesus Bizkaia, Mertxe Basauri y Eva de Pablos.

INAUTERIAK IRATXO ETA IPUINETAKO PERTSONAIEKIN

2012ko Berangoko Inauteriak iratxo eta ipuinen munduan oinarrituta egongo dira. Mila koloretako pertsonaiek lekua daukaten fikziozko unibertsoa otsailaren 25ean zabalduko da. Kalejira arratsaldeko 6etan abiatuko da Berangoetako kultur etxean, frontoira heltzeko asmoz.

Simon Otxandategi kalean barrena iratxoak eta parte-hartzaileen imajinazioak sortutako pertsonai sorta osoa ibiliko da. Neska-mutilak hilabete honetan arituko dira mozorroak prestatzen Ludotxikian. Apur bat nagusiago direnek, berriz, begiraleen laguntza izango dute Ludotekan eta Ludoklubean. Adinekoek ere prestaketa lanetan dabiltza, ilusio handiz, Nagusien Etxean.

Gauzak horrela, aurrekoetan bezala, adin guztietako lagunak batuko ditu segizioak. Auskalok girotuko du kalejira pilotalekura heldu artean. Bertan, D’Traka taldeak jarriko du umeentzako animazioa, adin guztientzako diskoteka hasi baino lehen.

Otsailaren 26an Simon Otxandategi taldeko dantzariak izango dira protagonistak, Zuberoako Maskarada interpretatuko baitute, zanpantzarrekin batera. Ohiko lez, 11:15ean abiatuko dira Lantzartetik, ordu bi beranduago Sabino Aranara heltzeko. Bertan, txikiek hartuko dute taldeko nagusien txanda, frontoian dantza erakustaldia eskaintzeko asmoz.

INAUTERIAK

OTSAILAK 25

18:00 Mozorroen kalejira Kultur Etxetik frontoiraino, Auskalo-rekin (iratxoak, burezurra, barraskiloa...)

19:00 Haurrentzako dantzaldia. "Marin eroa", D’Traka taldearen eskutik, frontoian.

20:00 Adin guztientzako diskoteka frontoian, 22:00ak arte.

Txokolatada izango da.

OTSAILAK 26

Zuberoako Maskarada eta zanpantzarrak. Ohiko lez, Simon Otxandategi dantza taldeak zeharkatuko ditu Berangoko kaleak.

11:15 Lantzarte auzoa

11:30 Axgane auzoa

12:45 Karabigane auzoa

13:15 Sabino Arana kalea

Ondoren, dantza erakustaldia eskainiko dute taldeko txikiek.